Tsophorsd Khmer
ម្នុស្ស <=> ម្នឺស្ស
~~~~~~~~~~~~
ម្នុស្សដប់មានចិត្តដល់មួយរយ
លើសខ្វះផតទយឥតដូចគ្នា
ចិត្តនេះកញ្ជ្រោលគ្រប់វេលា
បើគ្មានធម្មាសេចក្ដីស្ងប់ ។
ម្នឺស្សខ្លះគិតតែប្រយោជន៍ខ្លួន
លួចលាក់បាំងពួនឥតស្កល់ស្កប់
ល្បិចកលទុច្ចរឹតប៉ិនប្រសប់
ដល់ជីវិតចប់ជួនឥតភ្ញាក់ ។
ម្នឺស្សខ្លះសុំតែម៉ារួចខ្លួន
សម្ងំថែថួនគិតរាក់ៗ
លុះឆេះផ្ទះខ្លួនទើបទទាក់
ទួញយំពឹងពាក់អ្នកជិតខាង ។
ម្នុស្សខ្លះប្រឹងប្រែងទួលផែនដី
ជីវិតនេះខ្លីគិតអាងយ៉ាង
លះប្រយោជន៍ខ្លួនខំកសាង
ជឿនាំសំណាង ជាតិរម្យនា ។
ម្នុស្ស ម្នឺស្សរស់ក្រោមដើមតែមួយ
តែពន្លកត្រួយផ្សេងពីគ្នា
ម្នុស្សចេះយោគយល់ជៀសចងពៀរ
ច្បាប់ល្អនោះជា ដឹកនាំម្នឺស្ស ៕
«កំណាព្យថ្មី មនុស្សថ្មី ៣១»
Share:
